高雄+澎湖6日5夜之第5天~吉貝

今次高雄澎湖之旅要改善地方係............應該早一日飛去澎湖, 今次玩得太少了~ 希望出年再去,

台灣真係玩唔厭, 澎湖更係應該一年至少去二次 ^^ 

呢一篇網誌相多過字, 留番第日睇都睇得開心d, 希望你地感受到^^

未試過一次食咁多海膽

今日玩水影到呢輯相真係要多謝佢~ ^^  防水袋小姐~ (盛惠hk$299/香港誠品書店買)

開始啦~

2014年7月13日 澎湖吉貝

今日係酒店食飽早餐至出發~  雖然選擇少, 但都好ok~

經Blue哥我地參加了吉貝水上嘉年華~  NT1,000 (HK$263)  包食包玩包車費船費, 真係超晒值, 我打算明年去澎湖時, 要係吉貝住一個晚上, 可以再hea D

呢份單要keep好, 登船, 登車, 玩水上活動都靠晒佢

暑假o既赤崁碼頭真係人山人海, 今日我地係遲出發個團, 正常應該係早一個小時出發

如果唔分兩個時段, 真係迫爆碼頭都似

有10個太陽的澎湖真係唔講得笑, 防曬功夫唔做足一定會後悔莫及

參加旗豐一定坐旗豐船啦, 船程20分鐘左右, 都幾驚兩個姨甥會嘔, 所以今次我唔敢安排家姐一家去七美島玩~ 如果ok, 出年同家姐兩個人5月時去澎湖睇花火節時至帶家姐去七美啦. (暑假可以再帶兩個姨甥去澎湖住民宿睇星星玩其他 ^^...........依家已經plan 出年 哈哈哈)

去年我第一次o黎吉貝時, 剛好水退見到石滬, 興奮到一條友走o左出去~

2013年第一次去吉貝<<---請按我

如果識揸電單車, 上o左碼頭就可以去搵謝老細攞車, 可惜暑假多人到冇晒車~ 當然,,,我地4個人本來就唔打算揸電單車(有電動電單車, 有香港車牌就可以揸, 大前題係要換o左國際牌先)
等o左10幾分鐘謝老細至用麵包車載我地去玩水上活動

大家都好興奮,,,,,,,,,, 旅行.......................還是跟屋企人去最開心~ 最放

放好行李 (租locker NT50/一日)  著上救生衣 & 戴上安全帽就可以排隊去玩o架啦~
如果唔係有防水袋小姐, 今日就冇相睇了~

8合一水上活動, 齊齊玩o左香蕉船先~

第2樣~  2個坐前面, 一個企後面~

第3樣~ 呢樣差d比佢"西"到跌落海,,,,,,,,我地開始玩8合1水上活動時, 我同姨甥們講, 如果太勁, 唔好死揸住唔放, 因為我怕會扯傷手, 寧願跌落海等人救, 反正著o左救生衣, 點知家姐話, 唔係, 應該死都唔好放手至o岩, 哈哈哈, 玩完呢樣, 就知死唔放手都幾過癮~

因為人多, 所以其實每樣水上活動都只係玩幾廿秒, 不過排隊排得快, 玩完可以再玩~

今次輪到我同細姨甥玩, 又真係"西"得好過癮~

第4樣~ 家姐叫佢做pizza~ 似喎

我就冇玩呢樣啦~ 事關我怕我個大屁股坐o左落去出唔番o黎~ :)
兩個姨甥唔係好識聽國語, 旁人叫佢地緊握旁邊扶手而唔係正面個個

一個屁就玩完返o黎~ ^^

 第5樣~ 水上電單車

第六樣 & 第七樣~ 我地坐大船出海中心玩~

 玩SIR滑梯 & 浮潛~

咪睇少呢條梯, 臂力唔夠都幾難爬上去o架~

家姐要兩個仔一個拉一個推至爬到上去~ 

終於到我啦~  (唔知點解部  Iphone有咁多電o既, 影極都有, 真好

玩到攰??

中午12點係員工食飯時間, 所以一定要坐船返去岸邊

其實我地包o左午餐係旗豐吉貝海洋大飯店食, 去年食過, 7菜一湯唔錯o既, 可惜我地冇揸車, 如果又要等謝老闆接我地去,,,,,一定唔洗食啦, 又或者唔洗玩啦, 為免浪費保貴o既時間, 所以我地食自己~ ^^

沙灘旁有間小食店~  沙灘小站~   叫o左好幾樣o野食~

海膽炒蛋 (NT150-HK$40)   炒麵 (NT60-HK$16)  炒飯 (NT60-HK$16)  海豚皮涼伴 (NT100-HK$26)

百讚不厭o既澎湖絲瓜 (NT100-HK$26)  .......細碟o左d喎~

海蚵湯  (NT100-HK$26)

炸花枝丸 (NT100-HK$26)

 鐘螺~ (NT100- HK$26) 3隻~ 如果有甜辣醬就好啦~

另外再叫海膽食~ 正~!! (NT80 - HK$21) 一隻.......新鮮好味~正呀~

 睇下佢地點開海膽~

個桶有D唔開胃, 不過我見佢地開完之後, 唔知攞去邊再清洗D海膽至攞出o黎比我地食o既, 唔洗擔心

再追加3隻~

飽晒~ ^^

係....我地仲追加o左碟燒魷魚, 已經飽到上心口

上午玩得唔夠喉, 食飽飯再玩, 大部份人都係玩上午玩水就下午環島之類, 

估唔到下午轉移陣地, 去o左沙尾玩呀~ 真係正呀~ 本來我諗住上午玩水上活動, 下午就行沙灘,依家唔洗啦, 我地已經坐船去o左沙尾啦

出年要叫埋姊夫一齊去澎湖玩至得啦~

 下午1點廿幾分又再玩過~ 睇相啦, 唔寫咁多字啦 又係個句, 中午充電一次, iphone又影o左好多相&短片, 真係連個天都幫我 ^^

繼續玩玩玩

細姨甥唔知我地叫佢扮都敏俊c, 哈哈哈

我同家姐研究緊我係咪踼到d沙飛去鏡頭??(上面個d係沙)

肥家姐好努力咁跳~ :)

下午3點~ 又出海中心玩多一轉滑梯

3點幾沖身再call謝老闆o黎接我地去碼頭, 碼頭附近有幾間商店, 舊年我就坐係度嘆冰&食厚多士~ 今次舊地重遊~ 反正仲有 50分鐘~  (其實仲有第8樣我地冇玩, 就係抱礅啦)

就係呢一幕, 我心諗下次應該係吉貝住一晚, 唔洗咁急返馬公

呢張相都算係今次旅程代表作, 哈哈哈.  兩仔乸攞晒演技獎啦

一人一份冰, 正到冇朋友

呢間店o黎得吉貝冇理由唔入去幫趁~ 好多o野賣~ 

              細姨甥買o左張明信片寄比自已.................熙哥............都係我衰, 細個時我唔應該叫佢做熙哥, 等佢咁自大, 有一次帶佢去行山, 有人問佢叫乜名, 佢夠膽屎同人講: 你叫我熙哥得o架啦~
吹啤啤, 所以我依家只係叫佢做熙仔~

回程時行經電單車店~ 搵謝老闆影番張合照比開心之家院友們睇~ ^^

嘩....仲有幾分鐘就開船, 去廁所都去唔切~  20幾分鐘船程回到赤崁碼頭又有小巴載我地返馬公市, 真係好方便, 平靚正啊

其實唔肚餓, 不過為o左再食海鮮, 所以要趁早去搵位~ 澎湖曬魷魚方式好得意~

可惜清香今晚冇位比我地~ 就算6點3咁早去到都冇~ 唯有兜去另一間, 係兜路過程中
比大姨甥搵到佢想買但係高雄搵極都冇貨o既書, 估唔到居然係澎湖搵到

唔知食乜好, 唯有叫套餐~ 因為得兩隻蝦 , 我再加多兩隻, 然後叫o左3支汽水, 埋單 NT2000 (HK$530)...........

又有海膽~ ^^

剌身碎??

wasabi 醋蚵仔~ 生食o既~

食完至記得影相o既蝦, 其實今晚仲飽, 已經食唔得落

南瓜米粉, 少d餸食佢就一定好好味, 不過實在太多餸,

澎湖o既墨魚丸都好出名~

啦屎o黎個湯.....真係好飽呀~ (尋晚間清香 & 今晚的嘉賓, 如果想食海鮮, 一定係清香啦)

食飽叫兩個姨甥自己行番去酒店~ 我同家姐仲有地方想去~

就係觀音亭啦~ o黎咁多次, 我始終都冇行上去彩虹橋, 又有藉口下次去澎湖 (其實去澎湖唔洗藉口o架)

 係呢度影日落好靚o架, 希望出年影到啦

今日曬夠皮, 要滋潤下至得^^

明天10點機回程返高雄, 再搭19:00晚機返香港~ 今次澎湖之旅買o左好多o野, 6包小魚乾, 又有媽宮仙人掌酥及其他~ ...................聽日去到高雄仲有幾粒鐘, 應該去邊好呢?? ~ ^^