第一日,東京~好彩但好攰!

第一日,東京~好彩但好攰!

2008年6月19日下午10:57公開累積瀏覽 131 1

2008年6月19日 星期四 東京 天晴 有幾滴雨

今日去到機場check 埋in. 過埋關都係六點幾

今日搭西北8:10 飛東京.好準時,起飛冇幾耐9點鐘居然派飯食,唔係呀嘛,早餐都未落格.以為冇咁快派o野食,等我係大家樂叫o左皮蛋瘦肉粥 & 糯米雞一大隻.

食飽都係7:00.所以西北份义燒飯無福消受.............正常o既我應該掃晒份飛機餐o既.

以前搭西北好似多數都係外國人空姐,今次居然係一男一女香港人.不過年記就真係比較大.一個似師奶,一個就似亞叔. 準時12:20分就到成田. 不過換得JR PASS,都要搭14:45分o既 NARITA EXPRESS 去池袋. 我唔記得日本比香港快一個鐘,所以一睇到14:45嚇o左一跳.問佢地有冇早d o既車,佢地話差不多啦. 我至醒起,原來我仲係睇緊香港時間.

去到hostel 已經差不多4點幾5點. 約o左亞Sir 6:00 係東武百貨等. 所以洗個面就出去.

6年冇見亞sir. 佢都係冇乜點變. 佢帶我食 自然料理自助餐. 大部份都係蔬菜類. 另有少少魚肉. 仲有紅米飯等等. 我以前係香港唔多食菜,但就好鍾意食日本o既菜,尤其是沙律類.亞SIR 因為知我有病,所以帶我食餐咁正o既一餐,任飲任食90分鐘,好似係2000yen左右,下次再去日本. 一定要再食多次. 或者 23號晚係名古屋返東京時,可以一條友去食都得.

唔想阻亞sir 太耐.因為佢有個一歲o既女等亞sir 返去同佢一齊洗白白.所以我地7點半左右就走, 係餐廳門口影o左張相.我地傾得好開心呢. 亞SIR 早兩年再婚, 佢亦知我離o左婚有o左牛牛病. 亞Sir 仲話佢有好多朋友未結婚喎,叫我考慮考慮,*佢想介紹比一個比我*我真係想同亞sir講,我唔鍾意日本男人..............不過冇講出口,淨係識得笑.

因為日本d百貨公司收8點, 最想去個間 tokyo hands 都係收8點,所以冇得行,順路去o左sanrio 買o左KITTY 手巾仔.......didi ..我買o左你o既生日禮物啦...

仲有去o左買隻錶比家姐. 唔知佢點解佢戴親都好快冇電,所以我特登買隻永久唔洗換電o既錶比家姐.

ok, 聽日要晨早搭新幹線去大阪, 希望個邊都係只落幾滴雨就好啦.

呢間sakura hostel 唔錯呢. 可惜電腦得一部,又鬼咁多人等,我都等o左成個鐘呢....

冇得上傳今日d相. 聽日得就聽日先上傳啦.... good night~

http://www.hostelworld.com/