人到中年, 唔玩等幾時?? ^^: 黃山之旅(三) 西海完結篇

黃山之旅(三) 西海完結篇

2008年9月8日上午2:48

2008年9月1日黃山之旅第3天西海大峽谷完結篇

行呢條樓梯時, 碰到一個男人,問佢大峽谷靚唔靚, 佢冇話靚.只不過尋日因為黃山落雨,落唔到山谷底睇, 所以今日再行. 佢叫我地有乜食物就快D食晒佢,有乜水就飲快D晒佢, 因為要減輕背囊重量, 當然我地冇聽佢講啦.

有提示喔!~

行大峽谷最辛苦係上完山, 又要行番落山. 永遠行不完.

我好似企係幅山水畫前面影相咁. 如果個日天晴, D景會再靚D.

有時都唔明, 點解無啦啦要係山邊起D路比人行. 又唔明佢地點設計,

點做D行人梯級出o黎比人行??. 多人聚埋一堆,會唔會整爛d梯級??

其實係現場睇西海大峽谷,係十分震撼的. 好高好危險.

我同smile都後悔冇影video. 因為睇相根本睇唔到大峽谷o既震撼.

唔好睇我笑住影相, 其實腳震震.

終於o黎到西海大峽谷 (南口)

由獅林賓館到大峽谷北口(大約一小時)

北口到南口, 行o左差不多2小時50分鐘.

終於上返山頂, 重見天日.

呢張相真係成幅畫, 靚極.

行多20分鐘就到白雲賓館.

睇下我個衰樣, 已經得番半條人命~ >_<

由獅林賓館出發到白雲賓館行o左 4小時50分,,,,,一陣仲要行番去光明頂.

20分鐘後再次到達光明頂

一早已經諗住呢一餐食好d, 所謂食好d就係咁~ 食o左140幾蚊.

食o左一陣至影晒全部餸. 三鮮湯好似係40蚊, 番茄炒蛋30蚊, 糖醋骨最貴70蚊. 仲要係唔知d肉係邊, 只係炸粉+骨. 味道都ok o既.

無限量添水o既茶茶.

唔記得睇日落, 食飽出到外面已經冇得睇啦~

手上面個蘋果係山上面賣5蚊人仔一個, 山腳就1.5~

塊面曬到紅當當. 面油多到可以炒飯食. ^_^

當時氣溫幾凍,可能得番15度左右. 仲要行多25分鐘先到獅林賓館,

返到賓館除鞋, 發覺對新nike襪已經起晒毛頭.

公司有nike襪供應, 平時我唔鍾意著, 因為我覺得好鬼厚. 係今次行黃山, 就試著一次, 又ok 喎, 今次對新鞋都好抵讚, 好舒服好正. 又要再次多謝金田一爸o既介紹.

哈哈, 原來獅林賓館有自助餐食, 100蚊位, 不過唔知好唔好味?? 同埋唔知有咩食.

總括o黎講, 如果有3日2夜係山上, 一定要行西海大峽谷, 你問我西海係咪好靚? 最初係"夢幻景區" 時, 我地一路欣賞沿途風景, 一路影相,真係覺得好靚, 再行耐少少, 向山谷進發時, 真係覺得好攰, 又冇乜人行.只覺得有好多山圍住我地, 好高, 有時上番高少少o既位置時, 向下望留落去, 又覺得咁驚險o既路, 估唔到自己會行到. 係山谷冇見到雲海, 同Smile都有d失望, 希望一路行仲會見到雲海就好lu.其實當時攰到嘔, 就算靚~都可能冇乜心情留意到, 我地揸住張黃山地圖, 畫到個西海大峽谷都唔係好難行.

(其實係我地一相情願咁去諗好似行平路, 所以我連碌行山竹都冇帶, 諗住悠悠行5個鐘就ok >_<)

冇清析o既目標, 只知要行4,5個鐘, 而Smile又行得比較慢, 所以我地都唔知係咪要行6,7個鐘至得.曾經行到1個半小時o既時候, Smile諗過係咪要走回頭路返北海. 因為Smile驚自己行唔到, 又驚影響我,拖慢我. 但我話佢知, 如果佢想行晒大峽谷, 我一定會等埋佢囉. 至緊要係佢想唔想行. 最後都係兩個一齊行.

(Smile我知你一定得o既!!)

我地行o左2個鐘左右至行到大峽谷服務站. 係個度遇到一班後生仔女, 以為佢地同我地相反方向行, 原來都係同我地同一條路, 佢地張地圖就清析得多. 果陣時我地至知道, 我地需要經過4個山洞之後(行晒4個洞需時2個小時), 先會去到"步仙橋",然後再行多一個小時就會到白雲賓館, 所以我地當時就諗要快d行晒4個洞就會有好日子過. ^_^. 真係~! Smile o既步伐快o左好多. 終於係5個小時內行晒西海大峽谷,

連Smile都唔相信自己可以行得完.

行西海大峽谷, 我地唯一一樣後悔o既事, 就係冇影video返o黎,西海群山個種氣勢只留係我地記憶裡,比唔到朋友睇. 如果下次再有機會行西海, 一定要影video!!

旅遊,
綜合

回應 (7)
引用 (0)
永久連結

訂閱回應RSS摘要

Candy倉鼠

Candy倉鼠
2012年5月31日上午1:19

我來捧場喇! 你有行棧道, 我冇行啊! 因為有人腳痛又細膽, 我在山上住咗兩晚呀! 真喺由早行到夜, 瞓醒又行過, 好甘呀! 每日除了食飯時間, 8點開始遊到5點到另一間酒店check in. 我的舊患就咁行番出嚟! 到如今都..
我來捧場喇! 你有行棧道, 我冇行啊! 因為有人腳痛又細膽, 我在山上住咗兩晚呀! 真喺由早行到夜, 瞓醒又行過, 好甘呀! 每日除了食飯時間, 8點開始遊到5點到另一間酒店check in. 我的舊患就咁行番出嚟! 到如今都未斷尾啊! 但風景真喺黃山歸來不看嶽啊! 好靚!
你就好喇有行棧道, 希望再有機會去多次就好喇! 謝謝, 晚安!
顯示全部回覆共2則

cowcow

cowcow
2012年5月31日上午10:30

有機會都幾想再去黃山, 不過大陸我只係去得好少地方, 要去都可能去第2度唔會重複行黃山了. 我有行棧道呀?? 冇乜印象行窄的棧道啊.
呢2年開始行山, 我估再去西山的話, 一定唔會覺得辛苦了~ Candy你的舊患係腰痛呀??
Candy倉鼠

Candy倉鼠
2012年5月31日下午1:13

喺呀! 可能在黃山三日都要背起行李, 又要顧相機, 又要攞行山掍, 就得時間長, 咁就出事喇! 謝謝你!

lau lau

lau lau
2008年9月10日下午11:51

可惜見唔到雲海,有點可惜
回覆

cowcow

cowcow
2008年9月10日下午11:53

係啦....所以希望你中秋去黃山睇到啦. 記得影番d靚相返來呀.

甜呀

甜呀
2008年9月10日上午12:42

路真係人行出黎ge，建築ge人真厲害，但我有畏高咁咪行唔到？腳仔一定軟哂...........
回覆

cowcow

cowcow
2008年9月10日上午12:52

肥仔都有畏高, 但佢都爬到天都峰......哈仲係23年前. 我覺得佢好勁. 可能由個一剎那開始(聽佢講遊黃山)已經仰慕佢.呵呵呵.依家講乜都冇用.
你有機會去黃山, 一定要行西海大峽谷呀.話唔定比你見到雲海,你就lucky啦.

vor
2008年9月8日下午11:33

嘩~睇黎行到隻狗咁喎 .... 黃山都係唔好攪我喇真辛苦!!!
回覆

cowcow

cowcow
2008年9月9日上午12:05

唔係呀嘛~ 後生仔.咁就驚呀??

逍遙浪人

逍遙浪人
2008年9月8日下午9:48

唔緊要...下次再去過啦!!!!
我地呢個月份睇唔到雲海.....我都諗住遲d有機會都會再去......黃山唔同季節有唔同 ge 靚.....但下次我會plan由天海賓館果邊經西海大峽谷到北海....因為光明頂到北海果段路實在..
唔緊要...下次再去過啦!!!!
我地呢個月份睇唔到雲海.....我都諗住遲d有機會都會再去......黃山唔同季節有唔同 ge 靚.....但下次我會plan由天海賓館果邊經西海大峽谷到北海....因為光明頂到北海果段路實在太多遊客了.....真係攪到冇哂mood呢!!!!!!!
我同d friends今次行舊路到左天都峰...下次會行新路....如果第一晚就到天海過夜....第2日就可以依呢個計畫行西海大峽谷了~~
回覆

cowcow

cowcow
2008年9月8日下午9:54

嘩~乜你打得咁快o既?? o岩o岩至留言比你.
我同Smile都想下次再去. 我就想冬天去. 但我估我唔會點行山啦. 只係想欣賞風景咁. 不過都係想o者. 中國大陸仲有好多地方都好想去, 所以黃山唔知幾時再去第二次. 不..
嘩~乜你打得咁快o既?? o岩o岩至留言比你.
我同Smile都想下次再去. 我就想冬天去. 但我估我唔會點行山啦. 只係想欣賞風景咁. 不過都係想o者. 中國大陸仲有好多地方都好想去, 所以黃山唔知幾時再去第二次. 不過我地估計下次去, 應該會再平d.
我地今次o岩o岩遇著佢地開課日. 所以好少人呀...不過係始信峰都遇到唔少團, 嘩嘩嘩. 好似打到o黎咁. 係舊石度影相都爭崩頭. 笑死人.
我今次冇去飛來石, 有點遺憾.